網議政事：區會劃地挑宿怨新舊乳鴿互數臭

反對派又為私怨「打交」。前民主黨成員、沙田利安區議員麥潤培，近日與民主黨沙田烏溪沙區議員李永成fb展開罵戰。事緣選舉管理委員會近日公佈明年區議會選區劃區建議，李永成向網媒話，渠對沙田「迎海」被劃為新區感到奇怪，麥潤培就發帖話佢唔熟區、「低能」。李永成就還拖話麥潤培系懦夫，仲踢爆對方經常唔開會。麥潤培就寸嘴話呢個系渠「風格」喎。

話說外間一度估計，選管會會因應烏溪沙人口增長而分拆為「迎海」及「烏溪沙」兩個選區，惟選管會最終重組馬鞍山西的選區，由「鞍泰」及「頌安」重組出一個新選區「海嵐」。李永成在接受網媒訪問時就稱，選管會「拆西唔拆東」，做法奇怪。

麥潤培寸李永成唔熟區

麥潤培就對李永成發帖，揶揄渠「一廂情願又唔熟區」，「唯恐天下不亂」，質疑話「迎海」及「烏溪沙」根本就人數唔夠，無法劃為兩個選區，仲恥笑渠「低能」，仲話：「呢個區點得返黎大家心照啦！」

李永成就反擊話麥潤培曲解渠意思，仲回帶話對方「經常無理走來搞我」，仲明寸麥潤培成日唔開會：「我好多正經事要做……麥潤培，你區議會出席率都幾低，有時見你無，有時見你開會坐一陣就走，有時見你遲到好多然後講幾分鐘影完張相又走，我唔知呢行為系咪你自己講『抽水』，但系你唔好咁懶開會啦，開會系議員責任。」

李反斥麥懦夫篤背脊

佢仲細數對方惡行：「上次我同運輸署開會，你因事遲到，我無攻擊過你；你在該會議上因幾件事畀（俾）人用好嚴厲語氣鬧，你無出聲，我仲幫你講好說話解圍；但系你恩將仇報，我因其他工作早了15分鐘先離開，你趁我不在的時候反而鬧我，這是懦夫所為！……你在我背後講閒話，篤背脊，是卑鄙小人才做的事！亦是懦夫所為！」

李永成直言：「有朋友告訴我，你可能誤會了是我當年趕你離開民主黨的，我只能在這裏說，當年趕你離開民主黨的人不是我，其實在最後階段，丁仕元議員、我和多位黨友都盡了最後努力想保住你，但是當年你得罪了太多人，保不住你。哈哈！恩將仇報，搞笑！」

麥潤培就fb反擊，話自己「討厭開埋無聊會」，「我相信個個市民都好清楚我咁多年的工作模式！勤奮於地區，別沾無聊圍爐應酬及不關事的會議。」渠更直言：「我唔妥你就會繼續唔妥你！冇原因都可以的。」